ყველა მოდული ხორციელდება პირისპირ. ტრენერის მიერ მასალის მიწოდებისათვის გამოყენებულ იქნება სხვადასხვა საშუალება – ინტერაქტიული პრეზენტაცია თვალისჩინო მასალით, წასაკითხი მასალა, მულტიმედია მასალა, თუ სხვა. ამასთან ერთად სასწავლო დროის ორ მესამედზე მეტი დაეთმობა სხვადასხვა ჯგუფურ და ინდივიდუალური სავარჯიშოებს, სასწავლო მაგალითების გარჩევას, პრაქტიკული სიტუაციების მოდელირება-სიმულაციას, თამაშებს, თვით-რეფლექსიასა და ტრენერის უკუკავშირს.
ყოველი მოდულის (ჯამში 5) დასრულების შემდეგ მოხდება მონაწილეთა შეფასება. აქსელერაციის პროგრამაში მონაწილეობის გაგრძელებისათვის, აუცილებელია სასწავლო კურსის მინიმუმ 80%-ის მაინც წარმატებით დასრულება.
მოდული „სოციალური მეწარმეობა და სამეწარმეო სტრატეგია“
მოდულის მიზანია მონაწილეები დაეუფლონ ცოდნასა და უნარ-ჩვევებს, რომლებიც დაეხმარება მათ განსაზღვრონ სოციალური საწარმოს პოზიცია ბაზარზე და შეიმუშაონ ბიზნეს-მოდელი.
მოდული აერთიანებს სასწავლო საკითხებს, რომლებიც უკავშირდება სოციალურ მეწარმეობას, სამიზნე მომხმარებლის შესწავლასა და ბაზრის შეფასებას, პროდუქტს და მის განვითარებას, საფასო პოლიტიკასა და შემოსავლის გენერაციის მექანიზმებს, კონკურენტული კონიუნქტურის ანალიზს.
მოდულის ხანგრძლივობა 3 დღე.
მოდული „საოპერაციო საქმიანობის მართვა“
მოდულის მიზანია მონაწილეები დაეუფლონ ცოდნასა და უნარ ჩვევებს, რომლებიც დაეხმარება მათ საოპერაციო საქმიანობის – წარმოების და /ან მომსახურების – მართვაში.
მოდული აერთიანებს ისეთ საკითხებს როგორიცაა, საოპერაციო პროცესის ორგანიზება და განლაგება, საწარმოო სიმძლავრის დაგეგმვა, მომარაგება, ადამიანური რესურსები, ხარისხის მართვა.
მოდულის ხანგრძლივობა 2 დღე.
მოდული „მარკეტინგი და მარკეტინგული კომუნიკაცია“
მოდულის მიზანია მონაწილეები დაეუფლონ ცოდნასა და უნარ ჩვევებს, რომლებიც დაეხმარება მათ მარკეტინგული კომუნიკაციის წარმოებასა და გაყიდვების ორგანიზებაში.
მოდული აერთიანებს ისეთ საკითხებს, როგორიცაა სოციალური საწარმოს პოზიციონირება და ბრენდის ფორმირება, მარკეტინგული კომუნიკაციის შინაარსის, საშუალებებისა და არხებისა განსაზღვრა, განსაკუთრებული ფოკუსით სოციალურ მედიასა და მარკეტინგის ეგრეთწოდებულ არატრადიციულ საშუალებებზე, პირდაპირი მარკეტინგი, გაყიდვების ორგანიზება.
მოდულის ხანგრძლივობა 2 დღე.
მოდულის მიზანია მონაწილეები დაეუფლონ სოციალური საწარმოს ფინანსური მართვის საფუძვლებს, რაც დაეხმარება მათ ფინანსური საქმიანობის დაგეგმვის, აღრიცხვის და შეფასების საქმეში.
მოდული აერთიანებს ისეთ საკითხებს როგორიცაა ძირითადი ფინანსური ცნებები, სოციალური საწარმოს ბიუჯეტის შედგენის საბაზო პრინციპები, ბუღალტრული აღრიცხვისა და ანგარიშგების საფუძვლები, სოციალური საწარმოს საქმიანობის ფინანსური შედეგებისა და სოციალური ინვესტიციის შეფასების მარტივი საშუალებები.
მოდულის ხანგრძლივობა 2 დღე.
მოდული „სოციალური საწარმოს ბიზნეს-მოდელი“
მოდულის წარმოადგენს შემაჯამებელ შეხვედრას, სადაც მონაწილეები მიღებული ცოდნის გამოყენებით ეცდებიან შეიმუშაონ თავიანთი სოციალური საწარმოს ბიზნეს-მოდელის პირველი სამუშაო ვერსია. ტრენერი ამ მოდულში გამოდის შემოქმედებითი პროცესის მოდერატორად.
მოდულის ხანგრძლივობა 1 დღე.
ბიზნეს-მოდელის შემუშავების პროცესი და მენტორინგი
სასწავლო კურსის წარმატებით დასრულების შემდეგ აქსელერაციის პროგრამის მონაწილეები გააგრძელებენ მუშაობას სოციალური საწარმოს ბიზნეს-მოდელზე. ამ პროცესში ისინი გამოიყენებენ სასწავლო კურსის დროს მიღებულ ცოდნა-გამოცდილებას. ბიზნეს-მოდელი წარმოადგენს სოციალური საწარმოს გარკვეულ წილად ზოგად, სქემატურ მონახაზს. მოდელირების ამოცანაა სოციალური საწარმო გააზრებული იქნას, როგორც სოციალური იდეის დანერგვა-განვითარების საშუალება. უნდა მოხდეს მისი კრიტიკული შეფასება სხვადასხვა ჭრილში, იქნება ეს სტრატეგია, მარკეტინგი, ოპერაციების თუ ფინანსების მართვა.
ერთი მხრივ, მონაწილე ეძებს პასუხს კითხვაზე, რამდენად ეფექტურია მის მიერ წარმოდგენილი სოციალური საწარმო შესაბამისი სოციალური ინოვაციის დანერგვა-განვითარების საქმეში, მეორე მხრივ, იგი სწავლობს სოციალური საწარმოს სიცოცხლისუნარიანობას. მისი ამოცანაა ჯეროვნად შეაფასოს რისკი დაკავშირებული ბაზართან (მოთხოვნა, კონკურენცია), საოპერაციო გარემოსთან (ხელმისაწვდომი რესურსები, თავსებადობა არსებულ ტექნოლოგიებთან, თავსებადობა სამართლებრივი მოთხოვნებსა და რეგულაციებთან, თავსებადობა ადგილობრივ კულტურალურ ნორმებთან), საკუთრივ საწარმოსთან (არსებული რესურსები, მათ შორის ცოდნა-გამოცდილება და know-how, სოციალური კავშირები და ადამიანური კაპიტალი, მართვის სქემა). ამ კითხვებზე პასუხის ძიების პროცესში მონაწილეს შეაქვს ცვლილებები ბიზნეს-მოდელის საწყის ვერსიაში, ახდენს მის მოდიფიკაციას და დახვეწას.
აქსელერაციის პროგრამა მონაწილის მოთხოვნის მიხედვით ითვალისწინებს კონსულტანტის დახმარებას 1 საკონსულტაციო დღის მოცულობით. კონსულტანტი უწევს მონაწილეს დახმარებას ბიზნეს-მოდელის შექმნაში.
სოციალური საწარმოს ბიზნეს-მოდელის ფორმატი
სოციალური საწარმოს ბიზნეს-მოდელის ფორმატი წარმოადგენს ა. ოსტერვალდერისა და ი. პინიეს ეგრეთწოდებული „CANVAS მოდელი“ ადაპტირებულ ვერსიას (Osterwalder & Pigneur, 2010). მისი მეშვეობით პროგრამის მონაწილემ უნდა გასცეს პასუხი შემდეგ კითხვებს:
§ ვინ არის სოციალური საწარმოს სამიზნე მომხმარებელი (რა საჭიროება ამოძრავებს მას, როგორია მისი გეო-დემოგრაფიული მახასიათებლები, როგორ შეიძლება შეფასდეს მოთხოვნა);
§ რა პროდუქტს სთავაზობს სოციალური საწარმო სამიზნე მომხმარებელს, რა სახის სარგებლიანობა უკავშირდება ამ უკანასკნელს და რას შეადგენს მისი საფასური;
§ როგორ უზრუნველყოფს სოციალური საწარმო მარკეტინგულ კომუნიკაციას მომხმარებელთან (მისი უკუკავშირის მექანიზმების ჩათვლით);
§ როგორ არის ორგანიზებული მომსახურების თუ პროდუქტის მიწოდება;
§ როგორ არის ორგანიზებული საოპერაციო პროცესი (თანმიმდევრულ ოპერაციათა ერთობლიობა, რომელიც გარდაქმნის რესურსებს პროდუქტად);
§ როგორ არის უზრუნველყოფილი საოპერაციო პროცესი საჭირო სიმძლავრეებით (მანქანა-დანადგარი, პროგრამული უზრუნველყოფა, აღჭურვილობა თუ სხვა), სხვადასხვა მასალებით, შესაბამისი კვალიფიკაციის მქონე პერსონალით.
§ როგორია სოციალური საწარმოს მმართველობით-ადმინისტრაციული სქემა (როგორ განხორციელდება მისი მენეჯმენტი).
§ როგორ ხდება შემოსავლის გენერაცია (მაგალითად, სამიზნე მომხმარებელი იხდის თავად, პროდუქტის საფასური იფარება მთლიანად ან სუბსიდირებულია მესამე მხარის მიერ, თუ მრავალი სხვა).
§ როგორია საინვესტიციო და მიმდინარე დანახარჯების სტრუქტურა და მოცულობა, თანადაფინანსების წყაროები და მოცულობა.
სოციალური საწარმოს მოდელის წარდგენა (pitching)
აქსელერაციის პროგრამის მონაწილეები, რომლებმაც წარმატებით დაასრულეს სასწავლო კურსი და შეიმუშავეს სოციალური საწარმოს ბიზნეს-მოდელი წარუდგენენ მას შესარჩევ კომისიას (pitching). წარდგენისათვის აქსელერაციის პროგრამის მონაწილეს ეძლევა 15 წუთი, რასაც ახლავს 15 წუთი ხანგრძლივობის სესია დასაზუსტებელი კითხვებისა და პასუხებისათვის. წარდგენის ფორმატი არ არის მკაცრად განსაზღვრული. მონაწილეს მარტო ან თანამოაზრეთა გუნდთან ერთად შეუძლია მიმართოს პრეზენტაციის თუ თხრობის ნებისმიერ ფორმას, გამოიყენოს შესაბამისი თვალსაჩინო მასალა და ასე შემდეგ. ამოცანაა მათ შეძლებისდაგვარად ნათლად და დამაჯერებლად გააგებინონ შესარჩევი კომისიის წევრებს თუ რა სოციალური ინოვაციის დანერგვა-განვითარებას ემსახურება მათი სოციალური საწარმო, როგორ წარმოუდგენიათ მათ მისი ფუნქციონირება და მომავალი.
ფიჩინგის შესახებ დამატებით მასალას შეგიძლია გაეცნო ბმულზე
სოციალური საწარმოს ბიზნეს-მოდელის წარდგენის საფუძველზე შეირჩევა აქსელერაციის პროგრამის ის მონაწილეები, რომლებიც გააგრძელებენ მუშაობას სოციალური საწარმოს ბიზნეს-გეგმაზე. შეირჩევა იმ სოციალურ საწარმოთა ბიზნეს-მოდელები, რომლებიც წარმოადგენენ სოციალური ინოვაციის დანერგვა-განვითარების ყველაზე ეფექტურ და სიცოცხლისუნარიან საშუალებას. პროგრამაში მონაწილეობა არ ითვალისწინებს ფულად კონტრიბუციას როგორც აუცილებელ წინაპირობას, მაგრამ წაახალისებს მას. ამასთან არაფულადი კონტრიბუციის აღწერა აუცილებელია.
შეფასებისათვის გამოყენებულ იქნება შემდეგი კრიტერიუმები:
§ რამდენად ცალსახაა, რომ სოციალური საწარმო წარმოდგენილი ბიზნეს-მოდელის სახით, მოემსახურება სოციალური ინოვაციის დანერგვა-განვითარებას (კონსისტენტურობა);
§ რამდენად შეესაბამება პროდუქტი და მისი საფასური სამიზნე მომხმარებლის საჭიროებებს;
§ რამდენად ნათლადაა ნაჩვენები მარკეტინგული კომუნიკაციისა და მომსახურების მიწოდების ორგანიზების ეფექტურობა და რეალისტურობა;
§ რამდენად ნათლადაა ნაჩვენები საოპერაციო საქმიანობის ეფექტურობა და რეალისტურობა;
§ რამდენად რეალისტურია შემოსავლების პროგნოზული მოცულობა მიმდინარე დანახარჯების გათვალისწინებით;
§ რას შეადგენს ფულადი და არაფულადი კონტრიბუცია.
წარმოდგენილი ბიზნეს-მოდელების შეფასება მოხდება შესარჩევი კომისიის მიერ. სულ აქსელერაციის პროგრამის ცალკეულ კოჰორტაში შეირჩევა არა უმეტეს 15 მონაწილისა.
აქსელერაციის პროგრამის მონაწილეები, რომლებმაც წარმატებით წარადგინეს სოციალური საწარმოს ბიზნეს-მოდელი, და შერჩეულ იქნენ კომისიის მიერ დაიწყებენ მუშაობას სოციალური საწარმოს ბიზნეს-გეგმაზე. აქსელერაციის პროგრამა მონაწილის მოთხოვნის მიხედვით ითვალისწინებს კონსულტანტის დახმარებას სულ მცირე 2 საკონსულტაციო დღის მოცულობით. კონსულტანტი უწევს მონაწილეს დახმარებას ბიზნეს-გეგმის შემუშავების პროცესში.
სოციალური საწარმოს ბიზნეს-გეგმის შაბლონი იმეორებს სოციალური საწარმოს ბიზნეს-მოდელის ძირითად თავებს: სოციალური საწარმოს სტრატეგიული პოზიცია ბაზარზე; მარკეტინგული მხარდაჭერა; საოპერაციო საქმიანობის ორგანიზება; ფინანსური მართვა. განსხვავება ისაა, რომ ბიზნეს-მოდელი, როგორც ითქვა, წარმოადგენს სოციალური საწარმოს საერთო, სქემატურ მონახაზს, ხოლო ბიზნეს-გეგმაში მოითხოვება სავსებით კონკრეტული და დეტალური ინფორმაცია.
სოციალური საწარმოს ბიზნეს-გეგმის საფუძველზე შეირჩევა აქსელერაციის პროგრამის ის მონაწილეები, რომლებიც მიიღებენ საგრანტო დაფინანსებას საინვესტიციო დანახარჯების დასაფარად. შერჩევის პროცესში შესარჩევი კომისია იხელმძღვანელებს იგივე კრიტერიუმებით, რაც ბიზნეს-მოდელის შერჩევისას.
დამატებითი მოთხოვნები ბიუჯეტთან დაკავშირებით
ბიზნეს-გეგმის შესყიდვების ბიუჯეტზე მუშაობისას გასათვალისწინებელია შემდეგი მოთხოვნები:
§ აქსელერაციის პროგრამის ბიუჯეტიდან არ დაფინანსდება პროგრამის მონაწილის ხელფასი;
§ იმ შემთხვევაში თუ ბიზნეს-გეგმა ითვალისწინებს სპეციფიკური კვალიფიკაციის მქონე დარგობრივი ექსპერტის მონაწილეობას, აუცილებელია მითითებულ იქნას აღნიშნული პირის ვინაობა და ბიზნეს-გეგმას თან ახლდეს მისი პროფესიული რეზიუმე და პორტფოლიო (მათ შორის წინარე სამუშაოების შესრულების ჰონორარი);
§ ბიზნეს-გეგმით გათვალისწინებული ძირითადი საშუალებებისა და მასალების შესყიდვისათვის, რომელთა ჯამური ღირებულება აღემატება 400 შვეიცარულ ფრანკს, განსაზღვრულ უნდა იქნას მათი ტექნიკური სპეციფიკაცია და ბიზნეს-გეგმას თან უნდა ახლდეს ინვოისი სამი მომწოდებლისაგან.
ბიზნეს-გეგმების შეფასება მოხდება შესარჩევი კომისიის მიერ, რომლის შემადგენლობა ასევე მოიცავს მოწვეულ ექსპერტებს. შერჩევა მოხდება იგივე პროცედურული წესით რაც იქნა აღწერილი თავში „პროგრამაში მიღება“.
აღსანიშნავია, რომ შესარჩევმა კომისიამ შერჩევის პროცესში შესაძლებელია მოიწონოს ბიზნეს-გეგმა, რომელმაც მიიღო შესაბამისი ქულა, გარკვეული პირობით და მოითხოვოს დამატებითი ინფორმაცია ან გარკვეული ცვლილებების შეტანა მასში. ამის შემდეგ იქნება მიღებული საბოლოო გადაწყვეტილება. სულ აქსელერაციის პროგრამის ცალკეულ კოჰორტაში შეირჩევა სულ მცირე 5 მონაწილე.
თუ გაქვს ინოვაციური იდეა, რომელსაც დადებითი
სოციალური გავლენის მოტანა შეუძლია და მზად ხარ ინტენსიური მუშაობისთვის, მაშინ აქსელერატორის
პროგრამაში მონაწილეობა შენთვისაა!
